كيف ترضي زوجتك ... علا السردي

1- ... وهي مشغولة و عم تجلي ، ادخل المطبخ ، قلها خلي عنك حبيبتي ، هاتي أكمل الجليات .. طبعاً انت بتتوقع إنو عينيها تغرغر بالدموع و تبدى تبكي من التأثر و تقولك .. ( اوك حبيبي يسلمو إيديك ) ... لا يا بطل .. ردة فعلها كالتالي .. ( بله روح حل عني و إطلع من المطبخ خليني أكمل .. انت بتعرف تجلي ولا تعمل إشي مفيد ) ... ما زبطت روح للإقتراح التاني .

2- ... في صباح يومٍ مشرق و بدون مناسبة جيبلها بوكيه ورد .. طبعاً انت بتتوقع إنها تفرح كتير و تعجز عن الكلام .. لا يا صديقي هي مش راح تعجز عن الكلام .. هي سيحضرها كل الكلام الي في الدنيا في هذه اللحظة الرومانسية النادرة و راح تقولك ( 50 دينار حقه  شوبدي أعمل فيه هاد كان جبتلي طنجرة الضغط الي نفسي فيها .. ميلة ) .. طبعاً إنت ضغطك راح يرتفع .. ولا يهمك لسه في أمل .. روح للإقتراح الثالث .

3- ...أصفن في عينيها دقيقتين و قلها ( شو حلوين عيونك ) ... طبعاً إنت بتتوقع إنها تخجل و تبتسم و تقعد تسبلك .. لا يا سيدي .. هي راح تبحلق فيك و تجيبلك صدمة نفسية و تقولك ( عنجد !! يعني إلنا عشر سنين متزوجين ! هلىء لما شفتهم.. ما تيأس خذلك حبتين بندول و روح للإقتراح الرابع .

4- ... لما تزور دار أهلك ، امدح فيها و بطبخها و بترتيبها و بإدارتها للبيت ... طبعاً إنت بتتوقع إنها تفرح لدرجة إنو تاني يوم تطبخلك كرشات.. لا يا صديقي .. ردة فعلها كالتالي ( شو مالك نازل مدح فيي عند دار أهلك ، ليكونوا بدهم يجوزوك من وراي !! والله أنا قلبي كان حاسس من زمان ، و تقلبك إياها دموع و ولولة و لطم ...

خلص بطل عندي إقتراحات ... إذا فشلت في كل ما ذكر ، لا تنساني من الدعاء و الله الموفق و المستعان.

انتظروني غدا .. في ... كيف ترضي زوجك .. الله يقدرني لما فبه الخير و الصلاح لهذه الأمة.