كيف ترضي زوجك !! ... نص لعلا السردي

1- ... في يوم إشتريله قميص جديد ، إختاري لون مميز و موديل جديد .. خليه يحس إنو كل شي بيلبقله .. طبعاً انتي بتتوقعي إنه لما يشوف القميص راح ينبسط كتير و يقولك ( يا قلبي تسلم إيديكي ، ليه مغلبة حالك ، كتير حلو ) ... لا يا حبيبتي ردة فعله راح تكون كالتالي ( شو هالقميص البشع .. بييي ما أشنع لونه ، أكيد جايباه لأخوكي الهبيلة ) ...

معلش حبيبتي و بشر الصابرين ... روحي للإقتراح الثاني ...

2- ..و هو عم ياكل و بكل رقة و قبل ما يدخل اللقمة في تمه ، إمسكي إيده و قليله ( خليني اليوم أطعميك بإيدي حبيبي ) ... هو راح يرفض على طول و يقولك ( لأ أنا باكل لحالي ) ... طبعاً إنتي بتفكري إنه قال هيك علشان ما يتعبك لكن الحقيقة المرة هي كالتالي .... إنتي لقمتك صغيرة و يا دوب تمسكيها بأصابعك و هو لقمته عبارة عن رغيفين ملفوفين حولين بعض على شكل لقمة ، يعني ما بتوفي معه إنك تطعميه يا قمر ... عادي عادي حبيبتي صحتين و عافية بعرفك ما بتيأسي بسرعة روحي للإقتراح الثالث ..

3- ... وهو طافي الكهربا و قاعد بالعتمة بيحضر فيلم ، إمشي على أطراف أصابعك و شوي شوي ، أقعدي جنبو شاركيه إهتماماته ... طبعاً إنتي بتفكري إنه راح يلتفت عليكي و يقول ( كنت عارف إنك جاي لأنو الغرفة نورت فجأة ) .... لأ يا حزينة إلي راح يصير كالتالي .. راح ينط فجأة من مكانو و بالبكس بنص وجهك و بالشلوت بنص بطنك و راح يضوي الكهربا و يقول ( هو إنتي !!! الله يسامحك ، فكرتك حرامي ) ...سلامات حبيبتي ... إذا كانت إصابتك طفيفة و لسه فيكي حيل ، روحي للإقتراح الرابع ...

4 ... إكتبي على ورقة قبل ما تنامي الكلمات التالية ( حبيبي .. لن تعرف أبداً كم أحبك ، الحياة بدونك لا شيء ، سأظل أحبك حتى آخر العمر ) ... و إطوي الورقة و حطيها جنب بكيت سجايره ، عشان يشوفها الصبح لما يصحى ... طبعاً إنتي بتتوقعي ، لما يرجع من الشغل يكون جايبلك بإيده هدية على هالكلام الحلو ... لكن الحقيقة الصادمة هي كالتالي ... راح يدخل البيت و قميصه ممزوع و الشرار بيطلع من عينو ، يعني شكلو عامل طوشة و راح يقولك ( شو الي عملتيه يا بنت الحلال ، أخدت الورقة إلي تركتيها جنب بكيت السجاير ، فكرتها طلبات الخضرة للبيت و أعطيتها للخضرجي ... الله لا يوفقك على هالعملة )

و إلى هنا أتمنى أن تظلي على قيد الحياة بعد هذه الإقتراحات ، لتحكي تجربتك لأحفادك و تذكريني بالخير ... على فكرة رمضان قرب و الواحد لازم يكتر من عمل الخير ... و الحظر عمل شرير .. بس حبيت أقولكم و الله الموفق و المستعان ..